Tenth Exams Two Time | టెన్త్‌క్లాస్ ప‌రీక్ష‌లు ఏడాదిలో రెండు సార్లు

Tenth Exams Two Time | టెన్త్‌క్లాస్ ప‌రీక్ష‌లు ఏడాదిలో రెండు సార్లు

• వ‌చ్చే ఫిబ్రవరి-మార్చిలో తొలి విడత ప‌రీక్ష‌లు

• ఆ త‌ర్వాత మేలో రెండో విడత పరీక్షలు

• స‌ప్లిమెంట‌రీ ప‌రీక్ష‌ల‌కు స్వ‌స్తి

• వచ్చే ఏడాది నుంచి అమలుకు చ‌ర్య‌లు పూర్తి చేసిన కేంద్రం

• ప్ర‌తిపాద‌న‌ల‌కు ఆమోదం

• మార్చి 9లోగా అభిప్రాయాలు తెలపాలని సూచన

Hyderabad : టెన్త్ క్లాస్ పిల్ల‌ల‌కు, త‌ల్లిదండ్రుల‌కు కేంద్ర ప్ర‌భుత్వం శుభ‌వార్త వినిపించింది. విద్యా విధానంలో సంస్క‌ర‌ణ‌లు తీసుకువ‌చ్చింది. విద్యార్థుల‌పై భారం ప‌డ‌కుండా సెమిస్ట‌ర్ విధానం ప్ర‌వేశ పెట్ట‌బోతుంది. వచ్చే విద్యా సంవత్సరం నుంచి పదో తరగతి బోర్డు పరీక్షలు ఏడాదికి రెండుసార్లు నిర్వహించేందుకు సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) నిర్ణయించింది. ఇందుకు సంబంధించిన ప్ర‌తిపాద‌న‌లు మంగళవారం ఆమోదం తెలిపింది. అయితే ప్ర‌తిపాద‌న‌లు పబ్లిక్‌ డొమైన్‌లో ఉంచుతామని, వీటిపై అభ్యంతరాలు స్వీక‌రిస్తామ‌ని పేర్కొన్న‌ది. అందుకు మార్చి 9 లోగా అభ్యంత‌రాలు తమకు సమర్పించాలని విద్యార్థులు, తల్లిదండ్రులను సీబీఎస్‌ఈ కోరింది. ఈ కొత్త ముసాయిదా నిబంధనల ప్రకారం మొదటి విడత పరీక్షలు ఫిబ్రవరి- మార్చిలో, రెండో విడత పరీక్షలు మేలో జరుగుతాయి. ఇక్క‌డ విద్యార్థుల‌కు కొంత వెసులుబాటు క‌ల్పించింది.
విద్యార్థులు కావాలనుకుంటే ఈ రెండు పరీక్షలకు కూడా హాజర‌య్యే అవ‌కాశం క‌ల్పించింది.
మొదటి విడత రాసిన పరీక్షల్లోని కొన్ని సబ్జెక్టులలో వచ్చిన మార్కులతో సంతృప్తి చెందితే ఆ సబ్జెక్టులకు రెండో విడత పరీక్షలను రాయకుండా మానేయవచ్చు. పూర్తి సిలబస్‌కే ఈ పరీక్షలు నిర్వహిస్తారు. అభ్యర్థికి రెండుసార్లూ ఒకే పరీక్షా కేంద్రాన్ని కేటాయిస్తారని సీనియర్‌ అధికారి ఒకరు తెలిపారు. బోర్డు మొదటి, రెండో విడత పరీక్షలు సప్లిమెంటరీ పరీక్షలుగా కూడా పనిచేస్తాయి. ఎట్టి పరిస్థితుల్లో ప్రత్యేక పరీక్షలు నిర్వహించరు. అంటే ప్రత్యేకంగా సప్లిమెంటరీ పరీక్షల విధానాన్ని ఈ విధానంలో స్వ‌స్తి ప‌లికింది. అయితే నూతన విద్యా విధానంలో భాగంగా, విద్యార్థులపై పరీక్షల ఒత్తిడిని తగ్గించేందుకు ఏడాది రెండు సార్లు బోర్డు పరీక్షలను నిర్వహించనున్నారు. తమకు వచ్చిన స్పందనలు పరిశీలించిన తర్వాత ముసాయిదాను సమీక్షించి తుది నిబంధనలు ఖరారు చేయనున్నట్టు సీబీఎస్‌ఈ పరీక్షల కంట్రోలర్‌ సన్యమ్‌ భరద్వాజ్‌ తెలిపారు.
* * *